MSCU Annual Assembly vawi 36-na hman a ni; Sawhthingah society thawkhho ṭha lo an awm
Mizoram State Cooperative Union (MSCU) chuan nimin khan Dawrpui Multipurpose Centre-ah Annual General Assembly vawi 36-na an hmang a; Cooperation minister PC Vanlalruata’n a hmanpui a, sawhthing leiah society thawkho ṭha thei lo an awm thu a sawi.
PC Vanlalruata chuan, MSCU hnuaia society hrang hrangte chu ṭangrual turin a chah a, 'Society-te kan hmalam hun atana min hruaitu tura ka duh chu 'united we stand' tih hi a ni a, kan ṭanrual chuan hmalam kan pan zel ang," a ti.
Kalphung thar sorkarin cooperative society angin hmalak chhoh a tum thu sawiin Minister chuan, "A bul ṭan nan society-te kaltlangin sawhthing kan lei a, a tam zawk chu an phûrin an thawkho ṭha em em a, chutihrualin thawkho ṭha thei lote pawh kan nei," a ti a, society kaltlanga hmalakna chu ram leh hnam damna tur a ni tih pawm a ṭul thu a sawi.
PC Vanlalruata chuan ṭhalai lehkhathiam zawkte society movement-ah hnuhluh a ṭul thu a sawi a, "MSCU huaihawtin university leh college level tan cooperative movement chungchang essay inziahsiak buatsaih ila, chu chuan ṭhalaiteah cooperative movement ngaihven loh theih lohna a tuh dawn a ni. A minister ka nih angin lawmman pakhatna Rs 1,00,000 ka rawn tum ang," a ti a; MCAB-in lawmman pahnihna Rs 70,000 leh MIZOFED-in lawmman pathumna Rs 50,000 an tum theih tur thu an sawi bawk.
Annual General Assembly hi MSCU president K Lalchamreia'n a kaihruai a; MLA K Laldawngliana leh Cooperative Societies registrar John LT Sang ten thu an sawi bakah, MSCU chief executive officer K Lalduhawma'n annual report a pe a, chawhnuah rorel inkhawm neih a ni.
MSCU hi March 29, 1975 khan Assam state hnuaiah Aizawl District Registrar of Cooperative Societies enkawl leh kaihhruaiin din a ni a; National Cooperative Union of India affiliated member an ni. Mizorama society hrang hrang 221-in MSCU annual subscription fee an pe a, state level cooperative societies pakua, district level cooperative societies pakhat leh primary cooperative society 211 an ni.