District pathumah land records hlan fel

Saitual, Hnahthial leh Khawzawl district-ah te Land Revenue & Settlement (LRS) department-in a taka hna an thawh thei nan district pathum huamchhung khuaa land pass chi hrang hrang leh guard file-te chu heng district pianchhuahna district office atangin district thar DC office-ah an hlan fel tawh.

Saitual district land record-te chu Aizawla Revenue Directorate leh Champhai SO office aṭanga hlan niin, heng record-te hi Saitual DC office-ah dah an ni. Hnahthial district land record-te chu Lunglei district aṭanga dawn niin, hengte hi Hnahthial DC office-ah lo dawnsawn a ni. Champhai SO office chuan Khawzawl leh Saitual district land records an kawl angte chu heng district pahnih DC office-ah an hlan fel tawh.

LRS minister B Lalchhanzova chuan land records inhlan chu district tharah mipuiten LRS department an mamawhna a sanzia hriain heng district pathumahte hian hna thawk thei tak tak tura thuam an tumna kal zel a nih thu a sawi a, "Land record inhlan phawt loh chuan mipui tan dawr theih an ni lo. Land record-te hi district hlui lamah thliar fel hna hautak zet mai chu thawktute inpekna zar a ni," a ti.