August aṭangin Serchhipah bawlhhlawh sawngbawl leh thliar hran kalpui ṭan dawn

Serchhip khawpuia bawlhhlawh sawngbawl leh thliar hran dan tur ruahmanna chu August, 2025 aṭangin New Serchhip North leh New Serchhip South VC huamchhungah pilot project anga kalpui a ni dawn a, July thla tawpah a tihchhinna (trial run) neih tum a ni.

Serchhip district bawrhsap Paul L Khuma kaihhruaiin nimin khan sorkar hotuten Serchhip khawpuia bawlhhlawh sawngbawl leh thliar hran dan tur ruahmanna chungchang an sawiho a; August, 2025 aṭangin bawlhhlawh sawngbawl leh thliar hran dan tur hi New Serchhip North leh New Serchhip South VC huamchhungah pilot project anga kalpui ni se, an ti.

Tarlan danin, PHE, UDPA leh Greenherd Pvt. Ltd-te'n Serchhip leh Chhiahtlangah bawlhhlawh thliar leh sawngbawl hna an kalpui dawn a; Greenherd Pvt. Ltd leh UDPA-te chuan bawlhhlawh lakkhawm leh paih hna an thawh dan her danglamin, chhungkaw tinte kawtkaiah bawlhhlawh hi an lakkhawm sak anga, bawlhhlawh ṭawih thei (wet) leh ṭawih thei lo (dry)-te chu bawm hrangah dahin, mahni in ṭheuhah thliar hran tur a ni tawh ang.

Ruahmanna ang chuan July thla chhung hian mipui zirtirna uar taka kalpui a ni anga, July thla tawpah a tihchhinna (trial run) neih hman tum a ni. August thlaah New Serchhip North leh South-ah a takin kalpui ṭan phawt tum niin, veng dangah a tahtawlin kalpui zel tur a ni.