One Day Seminar on Drug Abuse buatsaih

Mizoram State AIDS Control Society (MSACS) chuan nimin khan Taxation conference hall-ah ‘One Day Seminar on Drug Abuse’ an buatsaih a; Health & Family Welfare minister Lalrinpuii, MSACS chairman ni bawkin a hmanpui.

Lalrinpuii chuan, MSACS-in seminar pawimawh tak an buatsaih chu ruihhlo do kawnga rah ṭha thlentu a nih a beisei thu a sawi a, "Ruihhlo tel lo Mizoram kan neih theih nan ruihhlo lut tur vèn (supply reduction) leh ruihhlo hmangtu titlem tura hmalak (demand reduction) leh ruihhlo nghawng ṭha lo siamṭhat hna (harm reduction) sawt zawka thawk tur chuan department hrang hrangte ṭanrualna a ṭul. World Health Organisation chuan ruihhlo ngawl veina hi natna tih dam theih a tih avangin he natna tidam tur hian mithiamte ràwn nachang hriat a pawimawh," a ti.

MSACS project director Dr Jane R Ralte pawhin damdawia inchiu ṭhinte'n natna chi hrang hrang an inkaichhawn loh nan leh an hriselna nghawng chhe chak lutuk tur ven kawngah MSACS chuan opioid substitution therapy (OST), condom promotion leh syringe needle exchange program-te an kalpui ṭhin thu a sawi a, "OST hi ruihhlo châkna laka chhâwktu damdawi a ni a, ṭha taka OST an lak avanga lehkha zir chhunzawm thei te, pangngai taka hna thawk chhunzawm theite leh mi hman tlak ni leh thei hialte an awm," a ti a, MSACS hnuaiah ruihhlo ngaite tan targeted intervention (TI) project 30 leh link worker scheme project pariat kalpui a nih thu a sawi.

SHALOM chief executive officer Dr Chawnglungmuana chuan, "Indian Constitution Article 47 leh The Narcotic Drugs and Psychotropic Substances Act, 1985-ahte ruihhlo do chu mi tin mawhphurhna a nih thu tarlan a ni a. Tunlaiah sikul naupang zingah ruihhlo ngai an awm ṭhin a, ruihhlo ti lo tura inzirtirna kawngah hmalak nasat a ngai hle," a ti.

Seminar-ah hian doctor, Police, Excise & Narcotics, MSDRB, MSACS, Food & Drugs Administration, Samaritan Society leh Kohhran hrang hrang aiawhte an tel a; mithiamte'n ruihhlo do leh ruihhlo ngaite enkawl dan thupui hrang hrang an sawifiah a ni.