Union Minister leh Chief Minister-in Rualbanlote hmanrua tur an sem

Sorkar laipuia Social Justice & Empowerment minister (Cabi-net) Thawar Chand Ghelot leh chief minister Lal Thanhawlate chuan, nimin khan Ramhlun Indoor Stadium-ah rualbanlote hnenah anmahni pui thei tur bungrua leh khawl chi hrang hrang an sem. Union Minister chuan, Aizawlah kum 2017-18 aṭangin B.Ed. (Special Education) zirna ṭan a nih tur thu a puang.

CM Lal Thanhawla chuan, hnam fing zawkte'n heng pianphunga rualbanlote chu mi bika ngaiin mi pangngai leh theihna danglam bik nei, differently abled leh specially abled tia an sawi ṭhin thu a sawi a, "Hetiang lamah hian keini Mizote pawh a hnam anga kan
ṭhan harh a ngai," a ti.

Lal Thanhawla chuan, Mizo mipuiin vohbikte enkawl leh duhsak nachang an hre chho zel chu thil lawmawm tak a nih thu sawiin, "Pathianin mihringte angkhat vekin min siam a, angkhatin min en a, keini pawhin duat leh hmangaih takin mi bikte hi kan enkawl a ngai a ni, a ti a; an chanpual dik tak an chan theih nan sorkarin chak taka hma a lak mek thu a sawi.

Chief Minister chuan, rualbanlote hamṭhatna leh hmasawnna turin Mizoram sorkar chuan sorkar laipui nen ṭanghoin chak taka hma an lak dawn thu a sawi a, "Nu leh pate leh khawtlangte ṭanhona kan mamawh dawn a ni," a ti.

Union Social Justice & Empowerment minister Thawar Chand Ghelot chuan, rualbanlo, persons with disabilities (PWD)-te tana nasa taka hma an lak mek thu sawiin, PwD-te ṭanpuina tura bungraw semna hun chu India ram pum hmun hrang hrangah vawi 4,343 an buatsaih tawh thu a sawi a; Aizawl-ah kum 2017-18 aṭangin B.Ed. (Special Education) zirna ṭan a nih tur thu a puang a ni.

Thawar Chand Ghelot chuan, piangphunga rualbanlo zirlaite hnenah kum 2014-15 aṭangin scholarship pek ṭan a nih thu te, kum 5 hnuai lam ri hriatna lama harsatna neite tan Rs. 6,00,000 zel sêngin naupang 472 hnenah cochlear implant vuahsak a nih thu te, rualbanlo mi 44,000 hnenah cheng vbc. 260 chuang a pung tlem zawka loan pek tur ruahman a nih thu te, mi 27,000 hnenah cheng vbc. 39 sêngin skill training programme buatsaih a nih thute a sawi.

Union Minister chuan, Ministry of Social Justice & Empowerment-in Social Welfare department leh ruihhlo ngaite tana thawktu NGO-te sum leh grant an la pek hmabak chu thla thum chhungin pek chhuah a nih tur thu a sawi a; India rama piangphunga rualbanlote'n identity card inang tlang an neih theihna turin survey tih nan leh ID card siam nan district tinah cheng nuai 20 zel pek a nih tur thu a sawi a puang.

Thawar Chand Ghelot chuan, National Institute for Locomotors Disability (NILD), Aizawl Regional Centre building sak mek chu April 2017-a zawh beisei a nih thu sawiin, "He Centre kaltlang hian chak takin hma PwD-te hmakhua atan kalpui a ni dawn," a ti.

Nimina hmanrua leh bungrua semnaah hian pianphunga rualbanlo leh harsatna nei mi 370 hnenah bungrua leh khawlte sem a ni a; chungte chu - visual aid (talking calculator, talking table clock, rupee checker with wallet), daisy player, smart phone, hearing aid, kit for intellec-tual disability, wheelchair, zak-dawh tiang, auxillary crutch, pros-thesis, orthisis leh CP chair-te a ni.

Inkhawmah hian parlia-mantary secretary (Social Wel-fare) K Lalrinthanga pawh a tel a; pianphunga rualbanlo eng emaw zat an kalkhawm a ni.