Mi mangangte puihna hmun hawng

Mi mangang leh rilru lam natna tuarte tana pan tur, Mapuia Crisis Centre (MCC), Chanmari, Ramhlun Road chu nimin khan Dr C Lalhrekima'n a hawng.

He centre hi mi mang-ang leh ṭanpui ngai, mahni intihhlum duhna khawp hial neia rilru mangangte ṭanpuina hmun tura din a ni a; February 28, 2016-a boral ta Lalhruaitluanga (Mapuia) s/o Rev Dr H Vanlalruata hriatrengna atana din a ni.

He hmun hawngtu Aizawl Civil Hospital-a Psychiatry-a head of de-partment chuan, "He-tianga mi mangangte
ṭanpuina hmunpui kan nei tur hi a lawmawm a, a hun taka ṭanpuina hmuh chuan mahni intihlum tur tam tak hi chhan theih an ni," a ti.

Dr Hrekima chuan Mi-zoramah rilru mangang, mahni intihlum hial duh mi tam tak an tawn tawh thu leh ṭanpuina an mamawh thu a sawi a, chumi kawnga hetianga vanduaina lo tawk tawh pastor chhungkua an pen chhuak chu midangte tana malsawmna an nih a beisei thu a sawi a; rilru hah leh manganna tawh chu thil zahthlak a ni lo a, hetiang mite tan ṭanpuitu zawn a ṭhat thu a sawi.

MCC hi darkar 24 chhung ṭanpuina ma-mawhtute tana biak pawh theihin an awm dawn a, mi mangang leh ṭanpui ngaite tan internet kal tlang pawha biak pawh theih an ni ang a, a hmunah kal chilh theih an ni bawk ang.

Kum naupang zawkte leh ṭhalaite mahni intihlum tur ven chu an hna ngaih pawimawh ber a ni dawn a, mahni intihlum chhungte ngaihsak zuia
ṭanpuitu an ni bawk ang.

He hmunah hian mi hnathawktu nghet an awm dawn bakah hemi kawnga mithiam tak takte rawn theihin an awm ṭhin dawn a; ṭanpui ngaite chu a thlawnin an enkawl thei dawn a, a ṭul dan azirin registration fee erawh lak a ni ang.

MCC hi heng phone number (0389) 2343424, 9485140303, 9485140304-ahte biak theih a ni a, an website www.mapuiacrisiscenter.com ah en chian theih a ni bawk.