Haulawng khuain kum 100 tlin an lawm

Haulawng khua chuan nimin khan an khuaa Zokhuma Memorial Field-ah an khaw kum 100 tlin an lawm a, minister Zodintluanga leh PC Lalthanliana ten an hmanpui.

Haulawng khuaa dam rei ber mipa leh hmeichhia hnenah leh centenary puala volley-ball tournament an buat-saiha lawmmante an sem.

Zodintluanga chuan, Haulawng khuain kum 100 a tling chu a lawmpui thu sawiin, "Haulawng tlang hi mei mit loa a awm ṭan chu kum 1916 a ni a, kum 100-na hun hmang theia kan awm hi kan vannei hle a ni," a ti a; kum 100 a tling thei chu Pathian hruaina vang a nih thu a sawi.

Centenary lawmna atana Haulawng mipuite inpekna leh insen-sona fakin Zodin-tluanga chuan, "Eng emaw tih dawn hleka sorkar kan pûr zel
ṭhin hi a veiawm a, sorkarah ṭanpuina dil mai chíng an tam ta hi a luhaithlak hle," a ti. Haulawng khuain centenary an lawmna turah sorkar pûr buai loa thawhlawm thawha anmah-ni an insengso chu a fak.

Zodintluanga chuan, Haulawng khua aṭangin mi chhuanawm tak tak an chhuak tawh tih sawiin, zirlaite leh ṭhalaite chu Mizoram huap pawha hming lang tham ni tura inzir turina fuih a, "Lehkha chhiar i uar ang u. Facebook leh whatsapp kan buaipui tluk zet hian kan zirlaite hi buaipui ila, kan zirlai leh hnate finchilh ila, Haulawng aṭang hian mi chhuanawm tak takte an chhuah theih lohna chhan tur a awm lo," a ti.

Haulawng centenary lawmnaah hian bialtu MLA, minister PC Lalthan-liana pawhin thu a sawi a; hnam lâm chi hrang hrang entir a nih bakah, intihhlimna hunte hman a ni a, khawpui mipui ṭhahnem tak an kalkhawm a ni.

Tun dinhmunah Haulawng khuaah hian in 527 ah mihring 2229 an cheng mek a ni.