Minister-te fiamthu thawh nana hmang Sorkar hnathawk an awm - Rinmawia

Mizoram Secretariat Service Association (MSSA) chuan nimin khan Art & Culture Auditorium, Berawtlangah inkhawmpui an hmang a; khuallian, minister Lalrinmawia Ralte chuan, sorkar hnathawk, an thawhna department minister fiamthu thawhna atana hmang an awm ṭhin thu a sawi.

MSSA khawmpui hi an senior vice president Lalrammawia'n a kaihruai a; Lalrinmawia Ralte chuan, "Sorkar hnathawk zingah mahni thawhna department changtu minister thurâwn pe ṭha duh si lo, minister chêtchhiatnaa fiamthu lo thawh leh maite an awm ṭhin a, chutiang mi chuan amah a intihmualpho bakah a hnathawh pawh a zahlo a ni,” a ti.

Sorkar hnathawkte enkawltu, Secretariat-a hnathawkte chu sorkar thluak bûr leh a fawng vuantute an ni tih sawiin Lalrinmawia Ralte chuan, sorkarin hna chak taka a thawh theih nan MSSA member-te chu chanvo leh mawhphurhna pawimawh tak an neih thu a hrilh.

Minister chuan, Mizorama rawn thawk ṭhin hnam dang officer-te leh state páwn lam mite'n Mizoramah sorkar hnathawk leh a dawrtu mipui inkarah thamna chelek lai leh hlemhletna thil hmuh tur an nei lo tih an sawifo ṭhin thu sawiin, office kalphung ṭha zawk nia an hriatte minister-te hrilh ṭhin turin MSSA member-te a chah a ni.