KHAWTHLIR

HC judge tur Nelson Sailo

Mizorama senior advocate Nelson Sailo chu High Court judge atan tun hnai khan dah thar a ni a; Mizo zinga High Court judge pathumna tur a ni. Thu dawn danin, High Court judge tur hian ukil leh judicial service mite ruat theih an ni a, Mizo zinga High Court judge ni tawhte chu ukil aṭanga lut vek an ni. Judge ni tur hian judicial service-a kum 10 thawk tawh emaw, High Court-a kum 10 tal ukil hna thawk tawh nih a ngai.

MRB branch thar

Mizoram Rural Bank (MRB) branch 81-na, Khawlailunga dah thar chu nimin khan minister of state C Ngunlianchunga'n a hawng. MRB branch thar hawnna inkhawm hi Khawlailung community hall-a neih a ni a, MLA Vanlalawmpuii Chawngthu pawhin a hmanpui a ni.

Zu man

Lawngtlai Vengpui Branch YLA chuan, nimin zing khan Lunglei aṭanga lak luh sap zu báwm 50 chuang an man a, an tichhe nghal. YLA-in zu an man hi tualchhunga hralhna ang chuan Rs. 3,00,000 hû a ni.

Lehkhabu thar

C Kamlova lehkhabu ziah, ‘An Introductory Brief History of Mizo Tribe' tih chu chief minister Lal Thanhawla'n nimin khan a tlangzarh. Lal Thanhawla chuan, Mizo pa ngeiin Hindi-a Mizo history a ziak chu chhuanawm a tih thu a sawi.

CRPF seminar

Vigilance Awareness Week hman mek pualin 225 Bn CRPF chuan Nilaini khan Zemabawka an unit headquarters-ah hlemhletna dona kawnga India khua leh tuite'n sorkar an ṭanpui theih dan tur chungchangah seminar an buatsaih.

Purun chin zir

District Horticulture Office, Lunglei chuan, nimin khan I&PR conference hall-ah Lunglei district chhunga purunsen ching tura thlan chhuah chhungkaw 50 hnenah purunsen chin dan tur an zirtir. Chhungkaw 50 hnenah hian purun ṭiak sang riat ṭheuh pek nghal an ni.