2018 inthlanpuiah kan sorkar dawn : Zoramthanga

MNF president Zoramthanga chuan, "Kum 2018 inthlan-pui lo awm turah chuan Pathian leh mipui zarah MNF kan sorkar tawh ngei dawn," a ti.

Nimina Vantawng Group YMA Hall, Then-zawla Serchhip West MNF Block political training leh mi thar lawm luhna inkhawmah thu sawiin, Zoramthanga chuan, "Congress chu India ram pumah a zung nen lam vân lam hawiin a tlu bungbu vú tawh a, Mizoram thleng hian a mawih chhe mek zel a ni," a ti a; Congress party chu an hmunpui ber Delhi-ah ding chhuak tawh lo tura ngaih an niin a sawi.

Congress hmunpui Delhi chu Congress khawnvartui ang leh state chu a phitá ang nia sawiin, Zorama chuan, "Khawnvartui ber a kang tawh chuan, a phitá chu a mawih nghal a ni," a ti. Congress party chuan India rama Lok Sabha MP 543 awmah 44 chauh an nei a, state 29 awmah state parukah chauh sor-karna an siam tih sawiin, chu chu sorkar term laklawh vang a nih thu leh inthlan a awm apiangin an tla zel niin a sawi.

Zoramthanga chuan, ZNP chu an ṭîlṭiak zel nia sawiin, ZNP President mangangin, 'Kawngkapui aṭanga ka luhpui theih loh che u chuan ventilation aṭangin ka luh pui ang che u' tiin a sawi niin a sawi a; ventilation aṭanga rem leh rem loa luh chu a fuh thei lo a, an pawr fap zel nia sawiin, "MNF chu kawngkapui aṭangin kan lut ngei dawn. Tuna MNF-a lo lutte hi in inchhîr lo ang, tifuh in inti tulh tulh dawn a ni," a ti.

MNF President chuan, Congress sorkarah sorkar hnathawkte'n a hun takah hlawh an la thei lo a, hmasawnna a kal thei lo nia sawiin, Saihlum anga ngêt thei lo leiba, K-Deposit-ah ringawt pawh cheng vbc. 1600 chuang a awm mek. Kawng lah ṭha lai reng reng a awm lo," a ti a; chu'ngte chu an 'Sámdâla theipui tla nghah' vang niin a sawi.

Zoramthanga chuan, sorkar hnathawk leh an chhungte'n Congress sorkar an ning tawh hle niin a sawi a, "Hmasawnna hna thawh sawi tur an neih loh vang te, drugs pun nasat tâk vang te, kohhran leh NGO phal loh zu an zawrh luih vang te, chal hnawih sena coconut an sawh keh avangin mipui leh Pathian pawi an sawi a, mipuite'n paih thlaka MNF sorkar siam thuai an nghakhlel hle a ni," a ti bawk.

MNF thuchhuah chuan, nimina Thenzawla
inkhawmah hian MNF zawm thar mi 95-te MNF President-in a lawm lut niin a tarlang.