AMC councillor-te'n Shimla an tlawh

Aizawl Municipal Corporation (AMC)-a councillor te chuan nimin khan Himachal Pradesh khawpui, Shimla an tlawh a; Shimla Municipal Corporation hotute nen an inkawm bakah, khawpui an enkawlna a hmunah an en.

AMC councillor-te hi deputy mayor Lalringliana hoin an kal a, Shimla Municipal Corporation-a deputy mayor Tikender Panwar leh a thawhpuite'n an lo dawngsawng. An inkawmnaah hian, Shimla-a bawlhhlawh lak khawm leh sawngbawl dan te, motor parking an kalpui dan te, in sak enkawl dante leh municipal sorkar kalphungte an sawiho a ni.

SMC Deputy Mayor chuan, tlang ram khawpui sorkarte harsatna a inan tlangpui thu sawiin, hmasawnna atan AMC nen thawhho zel an duh thu a sawi a; AMC Deputy Mayor Lalringliana pawhin, Shimla chu khawpui hlun tawh a nih avangin entawn tur tam tam awma a hriat thu sawiin, a bikin faina kawngah leh kea kalna tur an ngaih pawimawh kawngah entawn tlak a tih thu a sawi bawk.