Lehlángin Union Minister a rawn zin

Union cabinet minister, Social Justice & Empowerment changtu Thawar Chand Ghelot leh ministry hotute chu nimin khan Aizawlah an rawn zin a, nimin tlai khan Aizawl an chhuahsan leh nghal.

Thawar Chand Ghelot hian nimin zing dar 6 khan New Delhi chhuansanin, chawhmaah Lengpui Airport a rawn thleng a; dar 11-ah SCERT building, Chaltlanga National Institute for Locomotors Disability (NILD), Aizawl Regional Centre tlawhin, thawktute nen an inkawm.

NILD Aizawl Regional Centre-a thawkte chuan, pindan 2/3 an mamawh belh thu sawiin, pek belh an nih chuan chak leh zawka hna an thawh theih tur thu an lo thlen a; an mamawhte chu pe turin Union Minister chuan Mizoram sorkar a ngen nghal. NILD Aizawl Regional Centre hmun nghet tur hi Mizoram University campus-ah sak mek a ni.

Social Justice & Empowerment Minister hi ministry-a joint secretary Awanish K Awasthi leh under secretary Arun Karla ten an ṭawiawm a ni.