Trekking and Caving Expedition ṭan

YHAI, Mizoram State Branch buatsaihin nimin aṭang khan National Trekking and Caving Expedition 2016 ṭan a ni a; Youth Hostel, Luangmual aṭangin Sports & Youth Services director Zothanmawia'n a vai liam.

Zothanmawia chuan, trekking-a telte chu tawnhriat hlu tak chhar chhuak a, Mizoram mawina leh nawmnate a taka chhim a, mi dangte hnena sawi chhawng zel turin a chah.

Trekking-ah hian state hrang hrang aṭangin mi 17 an tel a, Youth Hostel aṭang hian km. 12-a hla Vaipuanpho camp an pan ang. Vaipuanpho aṭangin Ailawng, Hlawhhah, Nghalchawm leh Sihhmuite an tlawh dawn a ni.

YHAI, Mizoram Branch-te'n ruahmanna an siam ang chuan, trekking hi November 5, 2016-ah a thawh (batch) hnihna ṭan tur a ni a, thawh thumna chu November 7 aṭangin neih leh tum a ni.

Tun dinhmunah Youth Hostel Association of India (YHAI), Mizoram State Branch hian trekking route neih sa pakhat an nei a, route dang neih belh tumin ruahmanna an siam mek a ni.