RUSA kal dan tihdanglam tum a ni - Chief Minister

Mizoram College Teachers’ Asssociation (MCTA) chuan, nimin khan Central YMA Hall-ah Annual General Conference an hmang a; khuallian, chief minister Lal Thanhawla chuan, Rashtriya Uchchatar Shiksha Abhiyan (RUSA) kalpui dan siam ṭhat a nih dawn thu a sawi.

Chief Minister chuan, "Zirna sang zawk tihchangtlunna RUSA kal dan chu duhthusam a nih loh avangin a tihṭhat dan ngaihtuah mek a ni. Hmun tam taka zirna in sang zawk neih belh aiin zirna-in changtlung tak, ram páwn thleng zirlai chhawr tlak leh hman tlak chherchhuak thei kan neih a pawimawh zawk," a ti.

Lal Thanhawla chuan, zirtir hna chu hna zahawm leh ropui, mawhphurhna sang tak keng tel a nih thu sawiin, "Zirnain a tum, kawng engkima mihringte tihhmasawn hre chiang tur ber chu zirtirtu in ni a, in mawhphurna leh pawimawhnate hi a sang hle a ni," a ti a; zirtirtu, a bik takin college zirtirtute chu nakkin lawka ram leh hnam tana khua leh tui ṭha chhertu tur an nih avangin an nun uluk a ṭul thu a sawi.

College zirtirtute chu UGC aṭanga hlawh la an nih thu sawiin CM Hawla
chuan, "State sorkara hnathawkte aiin in dinhmun a ṭha a, chuvang-in, sorkar hian in lakah beiseinna sang tak a nei a, hei hi hre renga zirlaite in zirtir leh enkawlna kawnga theihtawp chhuah zel turin ka chah duh che u ni," a ti.

Chief Minister sawi danin, Mizoram chu ram ṭhang mek a nih angin sorkarin zirna leh hriselna a ngai pawimawh bik a, zirna leh hriselna lam dinhmun tihhmasawn leh tihchangtlun nan theitawp a chhuah mek a ni.

MCTA khawmpui hi an vice president H Lalnunmawia'n a kaihruai a, Higher & Technical Education secretary Benjamina leh MCTA president Dr PL Ramliana te pawhin thu an sawi.

Tun dinhmunah Mizoram sorkar hnuaiah college 24 a awm mek a, college 24-ah hian zirtirtu a ngheta thawk 626, contract-a thawk 37 leh part time-a thawk 180 an awm mek a ni.