Central YMA-in Myanmar aṭanga Mizorama raltlan hruaitute a kokhawm

Central YMA chuan nimin khan an hall-ah Myanmar aṭanga rawn raltlan hruaitute a kokhawm a, infuihtharna hun an hmang. He hunah hian Mizoram hmun hrang hranga raltlan camp-a awm hruaitute, raltlan pawl hrang hranga hruaitu leh Chin Hills- a MP leh MLA engemaw zat an tel.

CYMA president Lalhmachhuana chuan, Mizorama raltlante dinhmun chung­chang­ah infuihthar ṭulin an hriat thu a sawi a, boruak muanawm tak hnuaia an awm theih nan mahni camp-ah ṭheuh lo infuih thar tur leh hnam bil leh chi bil boruak siam lo turin a chah.

CYMA general secretary Prof. Malsawmliana tarlan danin, Myanmar aṭanga sahimna zawnga Mizorama awm mekte hi mi 27,751 an ni. Sorkar ruahman angin temporary ID card nei vek tur a ni.

CYMA hruaitute chuan, "Kan unaute in nih angin harsatna in tawh leh puih in ngaihnaah YMA chuan a pui zel dawn che u a, a thlahthlam dawn lo che u," an ti.

He hunah hian Aizawl DC Lalhriatpuia chuan sorkar inkaih­hruaina hrang hrangte a sawi a; Sr. SP CID (SB) Stephen Lalrinawma'n India citizen-te chauhin an neih theih Aadhaar card, driving licence etc. te neih tum lo tur leh ruihhloa sumdawnnaah inhnamhnawih lo turin a chah.

Excise asst. commissioner VL Vura Ralte pawhin raltlante chu ruihhloa inhnamhnawih lo tura hrilhin, ruihhlo do kawnga thawhpui turin a sawm nghal a ni.