Nikumah nuai 700 man oilpalm rah lei; Kuminah oilpalm refinery din tum

Godrej Agrovet Ltd. chuan kum 2024 chhung khan Kolasib leh Mamit district-a oilpalm chingtute thar oilpalm rah metric ton 5,335 an leisak a, oilpalm rah an leisak hi cheng nuai 700 vel man a ni. Kumin chhungin Godrej Agrovet Ltd. hian oilpalm refinery din an tum.

Kolasib district bawrhsap Robert C Lalhmangaiha hoin tun hnai khan DC conference hall-ah oilpalm chungchanga hmalakna, harsatna leh hmachhawpte sawiho a ni a; district agriculture officer Joseph Lalnuntluanga leh Godrej Agrovet Ltd. senior development officer Lalruatkima bakah Kolasib District Oilpalm Zonal committee leh Kolasib District Oilpalm Farmer Association hruaitute an tel.

Mizoram sorkar leh Godrej Agrovet Ltd.-te hian kum 2005 khan Kolasib leh Mamit district bikah oilpalm hmalakna kalpui turin inremna an ziak.

Godrej Agrovet Ltd. senior development officer Lalruatkima tarlan danin, kum 2024 chhung khan oilpalm chingtute oilpalm rah tharchhuah metric ton 5,335 an leisak a, hei hi a sum faiin cheng nuai 700 man vel a ni. Kuminah cheng nuai 900 man vel lei theih an beisei.

Lalruatkima chuan, oilpalm chingtuten oilpalm enkawlna atana an mamawh chi hrang hrangte man tlawm zawka an hmuh theih nan 'One stop solution' an din mek thu a sawi a, "Kumin chhungin Godrej Agrovet Ltd. chuan oilpalm refinery din kan tum a, packaging thlenga tih theihna hmun tur a nih dawn avangin Mizorama kut hnathawktute tharchhuah ngei oilpalm hriak kan leiin kan ei thei tawh dawn a ni," a ti bawk.