Sorkar ram lak tawhah hma la lo turin hriattir

Lunglei district Competent Authority for Land Acquisition (CALA)-te chuan hriattirna tichhuakin, national highway 54, 54A & 302 kawng laih zauh tur atana sorkarin ram a lak (acquire) tawh china kawng laih tur huam chhung (right of way)-ah mimal leh vantlang anga hmalak khap a nih thu an tarlang.

Lunglei district bawrhsap Navneet Mann, CALA (NH-54) ni bawk chuan Lunglei leh Hnahthial district-a NH-54 (Aizawl - Tuipang) kawng zauh leh tihchangtlun hna chu thawh zel a nih thu a tarlang a, "Hetianga kawng zauhna tur atan hian ram mamawh chin leh la hman ṭangkai tur chin ruahmanna (RoW) chu lak (acquired) a ni a, ram laksakte pawh an huan-lo-ram, thing leh mau, thlai leh thei leh chenna-in tihchhiat man zangnadawmna pek ni tawhin, ram lak tawhte hi sorkar laipui kutah hlan a ni tawh," a ti.

Sorkar ram lak tawhteah mimal/vantlang anga in sak leh vantlang thil siam khap a nih thu tarlangin Bawrhsap chuan, "NH-54 kawng âna in leh lo nei ṭhenkhatte'n hmun tam takah RoW nekin hma an la tih hriat a ni a, hetianga hma la mek leh lak tumte chu an hmalakna zawng zawng chhunzawm tawh lo tur leh titawp vek turin kan inhriattir nawn leh a ni," a ti a, thupek zawm duh lote chu The National Highways Act, 1956 Section 3E(1) leh Section 3E(2)(b) hmangin hrem an nih tur thu a tarlang.

Lunglei additional DC Rochuangkimi Khenglawt, CALA (NH 54A & 302) pawhin National Highway 54A & 302 (Lunglei - Tlabung) kawng laih zauhna atana The National Highways Act, 1956 hmanga ram lak tawhte chu sorkar laipui kuta hlan a nih tawh avangin sorkar ram a nih tawh thu a tarlang a; "Zangnadawmna dawng tawhte zingah in leh lo din thar leh mek emaw, la din tur kan awm pawhin kawng laih tur huam chhung (RoW)-ah hmalakna nei lo turin kan inhriattir a ni," a ti bawk.