Artui thar tamna tur kalpui mek a ni - AH & Vety Minister

Zoram Poultry Development Society (ZPDS) chuan nimin khan ZPDS Hatchery tualzawl, Tanhrilah an kum 10 tlin an lawm a, an hun hmanpuitu AH & Vety minister C Lalsawivunga chuan artui thar tamna tur kalpui mek a nih thu a sawi.

C Lalsawivunga chuan ZPDS hotu hmasate'n ram intodelhna tur kawng an lo ngaihtuah ṭhinnaah lawmthu sawiin, "Kan thlen chinah lawmna tur tam tak awm mah se, hmasawn zel turin kan ni," a ti a, mipui hnenah ar leh artui man tlawm zawka pechhuak thei turin duhsakna a hlan.

Sorkar hmalaknain Thenzawlah artui thar tam turin Mega Egg project kalpui mek a nih thu sawiin AH & Vety Minister chuan, "Ran chawa intodelhna turin vaimin tharna tur project pawh siam mek a ni," a ti a, AH & Vety chu ranvulh tute ṭanpuitu an nih angin ṭhahnemngai taka mipui tana thawk zel turin a fuih.

ZPDS hi May 18, 2015 khan AH&Vety department farm 'Regional Broiler Chicken Farm', Tanhril awmna ṭhinah din a ni. A tirah NABARD RIDF (XVII) 2012 leh RVVY sum hmanga ar note kar khata 20,000 thar thei tura din a ni a, NABARD RIDF (XXVI) 2020-21 sum leh SASCE 2021-22 sum hmangin kar khata ar note 40,000 ve ve thar theihna tura tihlen a ni.

Tunah hian kar khatah ar note 1,00,000 thar theihna khawl a awm mek.Kum 2024-25 audit report-ah chuan operational value Rs 1,05,30,313.50 a ni a, kum khat profit margin aṭanga 25% hi sorkar revenue-ah chhun luh ṭhin niin, kum 2016-2017 aṭanga kum 2024-25 thlenga revenue an chhunluh tawh zat chu Rs 33,63,984.89 a ni.