Home Minister-in jail-a tang mekte beidawnna hnuchhawn turin chah

Set Free Ministry, India chuan nimin khan Central Jail, Aizawlah graduation programme an buatsaih a, an hun hmanpuitu Home minister K Sapdanga chuan jail tangte chu beidawnna hnuchhawh turin a chah.

K Sapdanga chuan a sawi nawn mawlh mawlh duh chu beidawnna reng reng hnuchhawn tur tih a nih thu sawiin, "Mi beidawngte aia nun khawngaihthlak hi khawvelah hian an vang hle. Pathianin mihringah min siam a, min siamtu duh zawngin engtinnge ka bula awmte tan malsawmna ka nih ang tih ngaihtuah chungin nun hmang ang che u," a ti.

Jail hi sorkarin prision & correctional centre tiin a thlak mek thu sawiin Home Minister chuan, "Central Jail pawh hi thlak a nih thuai a rinawm. Central Jail hi set free ministry a la nih thuai ka beisei tlat a ni," a ti a, jail tang mekte chu a sual ber leh ṭha thei ngai tawh lo tur an ni lo tih inhre reng turin a chah.

Home Minister chuan insiamṭhatna hmun (correctional centre) enkawl kawngah hian sorkarin a tih tur tih loh tam tak a neih thu sawiin, "Chutichung chuan theihtawp a chhuah mek zel a ni. Tun aṭanga rei loteah hian kan building pawh sorkarin sak ṭhat a tum mek a, kum hnih thum hnuah chuan tun aia nuam leh felfai zawkin he hmun pawh hi a awm theih kan beisei," a ti.

Set Free Ministry, India buatsaihin jail-a awmte hi lehkhabu pahnih 'Nunkawng Dik' leh 'Krista Zalenna Kailawn' hmangtein zirtirna pek an ni. An zinga mi 163 exam hmachhawnte hnenah graduation certificate hlan a ni.