KHAWTHLIR

Speaker-in hmanpui

Assembly speaker Lalbiakzama chuan nimin khan MZP Hqrs, Khawzawl buatsaih Khawzawl khawpuia HSLC leh HSSLC pass tharte lawmpuina hun a hmanpui. Lalbiakzama chuan, zirlaite chu 'education is all round development' tih vawng reng turin a chah a, "Tuna in hlawhtlinna aṭang hian hma sawn zel turin tum sang tak neiin, ûm zel ang che u," a ti. HSLC pass thar 142 leh HSSLC pass thar 72 hnenah lawmpuina thilpek hlan a ni.

Cigarette man

Assam Rifles leh Champhai Police ṭangkawp chuan June 19, Ningani khan Tlangsam, Champhai district-ah foreign cigarette case 63, cheng nuai 81 man hua chhût an man.

MGNREGA sawiho

Rural Development & Administration minister Prof. Lalnilawma hoin nimin khan ni 100 inhlawhna, MGNREGA kalphung thar duan chungchang sawiho a ni a; Prof. Lalnilawma chuan, MGNREGA hnuaiah thingtlang mipuiten hnathawh tur pek chanvo an neih angin, MGNREGA hnuaiah mawhphurhna an nei tih a sawi a, "Dan ang taka mipuite'n hna an thawh a, thingtlang mipuite'n hlawk zawka he scheme hi an chhawr theih chu sorkar duh dan a ni," a ti.

Hnahthial SWMC

UDPA secretary Lalmalsawma Pachuau leh director Jacob Lalawmpuia te chuan nimin khan Hnahthial tlawhin, Hnahthial khawpuiin Sa-ang hmuna bawlhhlawh an paih mekna leh Rotlang East rama bawlhhlawh sawngbawlna hmun tur, Solid Waste Management Centre (SWMC) rua-hmante an enfiah a; SWMC ruahmanna chu ṭha thaw-khata an hriat thu an sawi.

LMC property tax

Lunglei Municipal Council (LMC) executive councillor (property tax i/c) Zorinsanga Hmar chuan nimin khan LMC BoC Hall-ah chhiah pek tur zat en leh online-a pek theihna tur 'property.lmclunglei.com' a tlangzarh. Lunglei khawpuia veng hrang hrang chu category-ah ṭhenin, zirchianna behchhanin property tax chawi tur zat hi puan a ni dawn a, mahni chawi tur zata sawisel duh nei tan sawiselna hun hawn a ni ang. Website hi Rs 10,00,000 senga an siam a ni.