Methamphetamine leh heroin an man

Excise & Narcotics department (END) chuan June 19, Ningani leh nimin khan hmun li-ah methamphetamine leh heroin ṭhahnem tak an man a, a neitua puh mi pasarih an man tel.

June 19 tlai dar 3:30 vel khan END-te hian Phainuam Kolasib district-ah heroin kg 2.502 (hawng 22) an man a, a neitua puh Lalramtiam (30) s/o Saliankhuai, Tahan ‘F’ Group, Myanmar leh Lalremruata (34) s/o Zonun-sanga (L), Zemabawk, Aizawla khawsa nia inchhalte an man. Heng heroin te hi state pawn lama tihral tum mek lai a ni.

END leh 20 Assam Rifles ṭangkawp chuan June 19 tlai dar 4:50 khan Pukpui, Lunglei district bulah Sapna Chakma (40) s/o Ashmi Kumar Chakma, Tiperaghat II, Lunglei district leh Punyo Sur Chakma (29) s/o Mitro Lal Chakma, Kamalanagar II, Lawngtlai district nia inchhalte hnen aṭangin methamphetamine kg. 3.477 (tablet 36,400) an man.

June 19 vek tlai dar 5 khan END-te chuan Zokhawtharah heroin hram 222.100 leh a neitua puh Zokhumi (65) d/o Khawneihlala (L) leh Lalnunsiami (37) d/o Lalnunfela, Khawmawi, Myanmar-a khawsa ve ve nia inchhalte an man.

Nimin khan END-te hian Tuipui, Khawzawl kawngah Rebecca Nianglinchingi (28) d/o Kapsialkhama (L), Champhai Vengthar nia inchhal hnen aṭangin heroin gram 418.40 (hawng 43) an man a ni.

Ruihhlo vanga mante hi The Narcotic Drugs & Psycho-tropic Substances Act, 1985 tlawhchhanin thubuai siamsak an ni a, nimin khan court-ah hruai an ni.