Ni 25 chhungin Champhai dist-ah leimin vangin in 15 chhia, mi 3 thi

Champhai district-ah May 30, 2025 aṭanga nimin thleng khan hmun 265-ah leimin a awm a, leimin vangin chenna in 15 a chhiat bakah, mi pathum an thi a, mi pahnih an hliam.

Champhai District Disaster Management Authority chuan nimin khan an chairman Mohammad Aaquib, bawrhsap hoin tun hnaia Champhai district-a ruahsur nasa vanga chhiatna thlenga hmalak dan tur leh mipui harsatna tawhte sutkian dan tur an rêl.

Ṭhutkhawma tarlan danin, Champhai district-ah hian May 30, 2025 aṭanga nimin thleng khan hmun 265-ah lei a min a, leimin vangin chenna in 15 a chhia. Leimin vangin mi pathum an thi a, mi pahnih an hliam a ni.

Champhai Bawrhsap chuan, June 22, 2025 tlai lam aṭanga ruah tam tham tak a sûr avangin Champhai khawpui leh district chhung hmun hrang hrangah chhiatna a thlen thu a sawi a, "Harsatna neite pui turin Bawrhsap Pisa a inhawng reng," a ti a; chhiatna hrang hrang thleng vanga harsatna awm theite sutkian a nih theih nana hma latu - VC, YMA, PWD, PE, NHIDCL, SBCC leh department hrang hrangte chungah a lawm thu a sawi.

Ṭhutkhawmah hian Champhai district-a chhiatna lian tham thleng mek - National Highway-06 kawngpui Chhungte khaw hnuaia leimin kumhlun chungchang te, Champhai Vengsanga Assam Rifles camp aṭanga lei tawlh chungchang te, Vengsang MPRO kawnga lirthei lian tlan phal loh chungchang te, leivung paihna chungchangte sawiho a ni.