Pawisa leh sakei ha an man

Assam Rifles leh Mizoram Police ṭang dun chuan June 20 leh June 22, 2025 khan India pawisa leh sakei ha an man.

Assam Rifles leh Zokhawthar police-te chuan June 20 khan an thu dawn bawhzuiin joint operation an nei a; Melbukah Bolero pick-up MZ-01 AD-4921 aṭangin India pawisa cheng nuai 21.88 an man. Pawisa kawltu hi Myanmar mi a ni a, pawisa a neih danah document neih a nei lo.

June 22, Pathianni chawhma dar 11:30 vel khan Assam Rifles-te chuan Tuipang leh Zawngling inkar kawnga lirthei an enfiahnaah KT Beirahu, Siaha hnen aṭangin sakei ha pathum, silai zên gram 150 leh 07 shotgun mu an man.

Pawisa avanga man hi Zokhawthar Police-in thubuai an siam sak a, sakei ha avanga man hi Tuipang Police-te'n thubuai siam sakin, dan anga hmalak chhunzawm zel tur a ni.