Olympic Day Run buatsaih a ni

Nimin kha International Olympic Day a ni a; Mizoram Olympic Association (MOA) buatsaih zing karah Olympic Day Run buatsaih niin, chief minister Lalduhoma'n Lammuala Olympic Day Run kharna inkhawm a hmanpui. CM chuan, Olympic-ah Mizo ṭhalai tam zawk an tel theih nan sorkarin hma a lak mek thu a sawi.

Kumin International Olympic Day thupui chu 'Move, learn, discover - Together for a better world' tih a ni a; Olympic Day Run-ah hian infiammi eng emaw zat telin, Sikulpuikawn, Vaivakawn leh Chanmari kawn aṭangin kein an kal a, Lammual an pan khawm. Lammuala kharna inkhawm chu MOA president Robert Romawia Royte-in a kaihruai a, National Games leh North East Games hnuhnung bera Mizoram aiawha medal dawngtute hnenah lawmman hlan a ni.

CM Lalduhoma chuan, khawvela infiammite duhthusam chu an ram aiawha Olympic-a tel a nih thu sawiin, "India aiawha Olympic-a inlan thei Mizo pahnih chiah kan la nei. Kan ṭhalaite zingah India aiawh thei khawpa talent nei ṭha tam tak kan neih kan rin avangin kum 2036 Olympic thlir chungin sorkarin Vision 2036 a kalpui mek a, kawng hrang hrangin hma kan la dawn," a ti.

International Olympic Day chu infiamna hmanga taksa hrisel zawk nei tur leh infiamna hmanga khawvel ṭha zawk - inunauna, inzahtawnna, remna leh muanna, intluktlanna leh chenhona kawnga mamawhte chawi lâr nana hman a nih thu Lalduhoma chuan a sawi.

Chief Minister chuan, mihring taksa chu hrisel taka a awm theih nan sawizawi ṭhat a ngaih thu sawiin, "Infiamna hi insawizawina ṭha ber pakhat a ni. Infiammite chu an taksa chauh ni lo, an rilru thlengin a hrisel ṭhin. Hnam, ṭawng leh sakhaw hrang hrangte chu infiamna hian duh thuhmun neihtirin, thinlunga inpawhtawnna leh inunaunate a neihtir ṭhin a ni," a ti.