Sorkarin kuhva chingtute hamṭhatna a ngai pawimawh - LRSWC Minister

Mizoram Kuhva Chingtu Pawl (MKCP) District Headquarters, Mamit chuan nimin khan Mamit Chhimveng YMA Hall-ah inkhawmpui an hmang a; Land Resources, Soil & Water Conservation minister Lalthansanga'n hmanpuiin, sorkarin kuhva chingtute ham­ṭhatna a ngaih pawimawh thu a sawi.

Lalthansanga chuan, sorkarin kuhva chingtute hamṭhatna tur a ngaih pawimawh thu sawiin, "Chief Minister hoa thuṭkhawmnaah in harsatnate kan ngaithla a, tunlai thiamna - scientific method leh khawl thiamna (technology) hmanga kan leilung mila kuhva enkawl ṭhat theihna tur ngaihtuah mek a ni," a ti a; district dangte tana entawn tlaka thawk turin Mamita kuhva chingtute a chah.

Inkhawmpuiah hian Mamit district Soil & Water Conservation DO K Lalrochhara, MKCP Gen.Hqrs president C Laldina leh general secretary Vanlalruata ten thu an sawi a; chawhnu lamah Mamit KVK aṭangin Dr Vanlalhmuaka Ngente-in kuhva chungchanga thil pawimawhte a zirtir a ni.