Hnahkhâwr pangang a puang

Khawzawl district-a Vàngtlang, Chalráng leh New Chalráng khuaahte buh ei chhetu hnahkhâwr pangang a puang mek a; Khawzawl District Agriculture Office chuan tun hnai khan loneitute hnenah damdawi semin, damdawi hman dan an zirtir nghal.

Sorkar thuchhuah tarlan danin, hnahkhâwr pangang hi Chalrang leh New Chalrang khuaa lo atan ram ṭheh inang nei chhungkaw 210-te loah hmuh a ni a, chu'ng zinga chhungkaw 70 loah a puang nasa zual. Vangtlang khuaa chhungkaw 80 loah pawh hnahkhâwr pangang hi hmuh a ni a, chhungkaw 10 loah a tam zual a ni.

Khawzawl DAO pisa aṭangin ADAO Lalrammuana leh agriculture mithiam pathum chuan June 21, 2025 khan khaw pathum hi an tlawh a, pangngang puanna hmunte an enfiah. Loneitute hnenah damdawi an sem a, damdawi hman dan an zirtir nghal a ni.