KHAWTHLIR

Result chhuak dawn

Mizoram Board of School Education (MBSE) chuan vawiin chhun dar 12:30 hian HSLC leh HSSLC Compartmental & Improvement Examination 2025 result a tichhuak dawn. Result hi Aizawl leh Lungleia MBSE office bakah, website www.mbse.edu.in ahte en theih a ni a; phone number 9863883041 leh 9863722521-ahte pisa hun chhungin zawhfiah theih a ni bawk.

Minister-in tlawh

Minister Lalthansanga chuan nimin khan Mamit khawpuia a department enkawl hrang hrang pisa tlawh. Thawktute nen an inkawmnaah Minister chuan, "Sorkar kaltlanga mipuite hamṭhatna tur leh khaichhuahna tura hmalakna awm reng rengah a chhawrtu mipui hnen thleng ngei turin hma la u la, hna entawn tlakin thawk ang che u," a ti. Department hotute'n mamawh an lo thlente chu a theih anga tihhlawhtlin a nih tur thu a sawi bawk.

Mamit Jail enfiah

Mamit district Integrated Child Protection Service hnuaia din Jail Inspection Team chuan nimin khan Mamit District Jail an tlawh a, táng zingah naupang kumtlinglo an awm leh awm loh an enfiah a, naupang an awm lo tih an finfiah. Jail tlawhnaah hian principal magistrate Esther Zorini Hauhnar hoin an thawk chhuak a, member Zatluanga Sailo, P Lalchunglura, Lalrinchhani, ZD Lalremruata, Lalrinhlui leh Alex Lalhriatpuia Sailo te an tel. Mamit Jail-ah hian táng mipa 55 leh hmeichhia 11 an awm mek a ni.

Kawng khâr dawn

Bawngkawn - Sairang kawng, Chaltlang Lily Veng huam chhunga tipper leh 407 stand inkar kawng chhak lamah lung tla mai theia ngaih a awm avangin vawiin hian then fai a ni dawn a, hei vang hian chhun dar 12:30 aṭanga hna thawh zawh hma chu kawngpui khâr a ni dawn.

Bawrhsapin tlawh

Champhai bawrhsap Mohammad Aaquib chuan nimin khan June 22, 2025-a Champhai khawpui hmun hrang hranga ruahsûr nasa vanga chhiatna thlenna hmunte a tlawh. Sorkar hotute leh khawtlang hruaitute nen harsatna chinfel dan tur an sawiho a ni.