BBBP Plantation Drive buatsaih a ni; Mizoram hmeichhiate an chhuanawm - Larsap

Directorate of Women & Child Development hnuaia State Hub for Empowerment of Women (SHEW) chuan nimin khan Sumtual, Aizawl Smart City Project, MINECO-ah hmeichhe naupangte puala thing phun beihpui thlakna, 'Beti Bachao Beti Padhao Plantation Drive 2025' an buatsaih a; Governor Gen. Dr Vijay Kumar Singh chuan hmanpuiin, Mizorama hmeichhiate chhuanawm a tih thu a sawi.

Beti Bachao Beti Padhao Plantation Drive-ah hian Governor leh WCD Minister bakah, sorkar official-te'n hmeichhe naupangte dikna leh chanvo venhim leh enkawlna ṭha pek pawimawhzia lantir nan Ashoka thing an phun a ni.

Governor chuan, hmeichhe naupangte chu zirna ngai pawimawh tur leh duhthusam an neihte an puitlin theih nan theihtawp chhuah turin a fuih a, "In tan khawtlang, state leh India chu nghet takin a ding zel dawn. Thing kan phunte hian hmasawnna, beiseina leh hmabak êng tak a lantir a, ṭhang lian zelin hrinna a pek mai bakah nghet takin a ding dawn a, hei hian hmeichhe naupangte dikna leh chanvo humhalh kawngah nghet takin kan ding tlat tih a entir a ni. Mizoram hmeichhiate an chhuanawm a, state leh ram hmel tidanglam theitu an ni," a ti.

Mission Shakti kaltlanga Beti Bachao Beti Padhao puala thing phun chuan hmeichhe naupangte hmasawnna tur leh environment ṭha nei tura hmalakna ngaih pawimawh a ṭulzia a entir tih sawiin Larsap chuan, "Hmeichhe naupang leh thing ṭiak phunte'n danglamna thlen turin enkawlna leh chhawmdawlna ṭha an dawn a ṭul," a ti a; thing a phun chu Mizorama hmeichhe naupangte pual a nih thu sawiin, chu chuan chakna, finna leh zahawmna pe se a duh thu a sawi.

Women & Child Development minister Lalrinpuii pawhin thu sawiin, Mizorama hmeichhe piang zat chu mipa 1,000 zelah kum 2022-23 ah 935 leh kum 2023-24 ah 956 a nih thu a sawi a, "Thawhhona ṭha tak hnuaiah hmeichhe naupangte dinhmun chawikanna scheme pawimawh tak Beti Bachao Beti Padhao kalpui a ni hi a lawmawm. Mizoram chuan sex ratio at birth dinhmun ṭha tak, national level aia ṭha zawk kan nei a ni," a ti.

Lalrinpuii chuan, Beti Bachao Beti Padhao chungchang inzirtirna nasa taka kalpui a nih thu sawiin, "Nikumah IEC tiam loin mi 70,208 hnenah zirtirna kalpui a ni," a ti a, thing phun beihpui thlakna ṭum 54 neih a nih thu a sawi bawk.