Mizorama court hrang hrangah POCSO thubuai la chinfel loh 194 a awm mek

Hursualna leh a kaih­hnawih thila naupang kumtling lote video leh thlalak thehdarh bakah, hetiang lam thil kumtling lote entir/hmuhtir chu danin a khap a, hetiang titu chu kum 5 aia tlem lo jail tàntir leh cheng nuai 10 chawitir theih a ni. Mizorama court hrang hrangah POCSO hnuaia thubuai ziah luh la chinfel loh 194 a awm mek.

Mizoram State Commission for Protection of Child Rights (MSCPCR) chairperson Jimmy Laltlanmawia hoin MSCPCR member-te'n nimin khan an pisaah thuthar thehdarhtute an kâwm a; kumtling lo khawih chhia a, mi dang hmuh theih tura hursualna video bawlh­hlawh siam nana naupang in­hnam­hnawihtirtu leh pholangtu Lalrampana thil tih chu pawi an tih thu leh, chutiang thila inhnamhawihte'n an phû tawk hremna hmu ngei se an duh thu an sawi.

MSCPCR hotute chuan, Mizorama court hrang hrangah The Protection of Children from Sexual Offences (POCSO) Act, 2012 hnuaia thubuai inchiah mek 194 a awm thu an sawi a, "Commission hian Gauhati High Court, Aizawl Bench-a POCSO case pending kan vil reng a, Mizorama court hrang hrangin POCSO case pending an neihte Gauhati High Court-ah an hriattir ṭhin. High Court chuan kan dil angin case pending zat min rawn hrilh ṭhin a, tuna data kan neih hnuhnung ber chu May 2025 kha niin, district court leh fast track court hrang hrangah POCSO case pending 194 a awm mek," an ti.

Naupan laia khawih­chhiat tâwkte chu enkawl­­tu ṭha leh enkawl dan mumal tak hnuaia kaih­hruai an nih chuan an ṭha chhuak leh thei tih sawiin MSCPCR hotute chuan, "Hetianga khawih tawkte hian mithiamte an pan vat a him ber a, sorkar pawhin an mahni enkawl­na tur leh mithiam hrang hrang a nei a ni," an ti a; hursualna kaih­hnawiha harsatna tâwk naupangte nihna puanzar leh miin an hriat theih tur zawnga hmalaknate chu dan kalh a nih thu an sawi.

POCSO Act chungchang inzirtirnaah nasa taka hma an lak thu sawiin MSCPRC hotute chuan, "SCERT-in sikul ṭhenkhatah kum khatah POCSO Act awareness campaign ṭum hnih an nei ṭhin a, mahse, tun hnaia thil thleng avangin ṭum hnih aia tam nei ṭhin tur leh sikul tam zawk tuam turin kan ngen. Sikula sem turin POCSO Information, Education, and Communication (IEC) material pawh danhremite nen Mizo ṭawnga letling turin kan buaipui mek," an ti.

MSCPRC hotute sawi danin, CBI-in tun hnaia naupang kumtling lo khawih chhia a, hursualna video bawlhhlawh siam nana naupang inhnamhnawihtirtu leh pholangtu Lalrampana CBI-in an man kaih­hnawihah CBI-in information an la pek theih loh avangin MSCPCR-in dan angin a tuartute an la buaipui thei rih lo. Hriat rûk deuh chu nei mah se, official data an la neih loh avangin an buaipui ngam rih lo a; CBI-ah information dil tumin hma an la mek a ni.