MUHCS atan sum pe lâwk dawn

Mizoram Universal Healthcare Scheme (MUHCS) zawmtu damdawi-inte'n damlote enkawlna senso chatlak loa an hmuh theih nan Finance department-in sum a pe chhuak lâwk ṭhin dawn tih Finance department chuan a tarlang.

Finance secretary Ramchuana chuan June 23, 2025 khan office memorandum a tichhuak a; MUHCS zawmtu damdawi-inte'n thla thum chhunga damlo enkawlna senso sum an mamawh zat tur Mizoram State Healthcare Society-in a chhût lâwka sum a dil ang zat quarter (thla thum) ral hmain pek chhuah zel a nih dawn thu tarlan a ni.

He ruahmanna hi MUHCS tluang taka kalpui a nih theihna tura April 14, 2025-a 12th Preliminary Commmitee ṭhutkhawma rel anga tih a nih thu tarlan a ni bawk.

Vanglaini palaiin March 2025-a a kawmnaah Health minister Lalrinpuii chuan, private hospital-te'n tun hmaa cashless-a healthcare scheme kalpui a nih laia sum an hloh nasat avangin an hlauhthawn tawh thu leh sorkarin MUHCS kalpui turah hian cheng nuai 50 ṭheuh pek lâwk a duh a, Chief Minister pawhin a remtih thu a sawi.

MSHCS pawhin tun hnaia Non-Government Hospital Association, Mizoram (NGHAM) thuchhuah an sawifiahnaah, 'Private hospital intelkhawm pawlte hian cashless avangin ni tin sum lut awm lo tura an ngai hi sorkar lam chuan cheng nuai 50 advance-a pek a inhuam reng,' tiin an tarlang bawk.