KHAWTHLIR

Khuai khawi leh ṭhelrêt sawiho

Chief Minister ruahmannain nimin Mizoram KVI Board chairman C Lalremliana pisaah khuai khawi leh ṭhelrêt lama hmasawnna tura hmalakna chungchang Land Resources Soil & Water Conservation (LRSWC) department, Horticulture department leh KVI Board hotute'n an sawiho. Mizoram sorkar chuan khuai khawiah lian tham taka hmalak a tum a, a ṭul anga bawhzui dan tur ngaihtuah a ni.

PYD-in thisen pe

Pentecostal Youth Department (PYD) Lunglei District-a Bible School chuan June 23, Thawhṭanni khan thisen pek an huaihawt a, Lunglei Civil Hospital tan thisen unit 13 an pe a, petute mipa 12 leh hmeichhia pakhat an ni.

Kawng khâr dawn

Ṭhuampui leh Selesih inkar kawng, Durtlang huamchhunga Arbai pêng bulah hume pipe phûm a nih dawn avangin he kawng hi vawiin zing dar 9 aṭanga tlai dar 6 thleng khâr a ni dawn. Kawng khâr chhungin Ṭhuampui lam aṭanga Selesih lama kal turte chu Arbai Peng aṭangin Durtlang lamah kal tur a ni.

Sipaia luh dan kawng kawhhmuh

Assam Rifles chuan June 23, Thawhṭanni khan Ryusa Elementary School, Meitsatla, Siahaah Indian Army leh Assam Rifles-a luh dan kawng inkawhhmuhna hun an buatsaih. AR hotute'n zirlaite hnenah sipaia luh theih dan te, sipaia lut tura pawimawhte leh sipaia ṭan ṭhatnate an hrilhfiah a ni.

Siaha district-ah Ar-va lak luh khap

Mara Autonomous District Council (MADC)-a Local Administration officer S Lalmuanpuii chuan thuchhuah siamin, Siaha district-a chêngte'n sa thianghlim leh hrisel zawk lei tur an neih theih nan leh Mizorama ran vulha eizawngte chhawmdawl nan Food Safety and Standards Authority of India (FSSAI) hriatpui loh ár leh sava lam chi (poultry) talh sate Siaha district-ah lak luh khap a nih thu a puang. Khapna thupek zâwm lote chu dan anga hrem an nih tur thu a tarlang.