Ration buhfai thla 3 quota la turte'n kut vawi 3 nem a ngai - FCSCA Dept.

Food, Civil Supplies & Consumer Affairs (FCSCA) department chuan, ration card eng leh card pawl neitute tana June-July-August ration quota sem tlai a nih chhan a sawifiah a; thla thum quota ration la turte'n e-PoS khawlah kut vawi thum nem zel tur a nih thu an tarlang.

FCSCA department chuan, fûrpui thleng tur thlir lawka sorkar laipuiin state sorkarte NFSA buhfai (a thlawn chin) thla thum chhung (June-August 2025) pe thei tura a ngen angin theihtawp chhuaha hma an lak thu leh, thla thum daih ration quota chu Food Corporation of India (FCI) aṭanga phurh chhuah kim a nih tawh thu an tarlang a, "June thla bul lam khan sem nghal mai tum a ni chungin, khawl thilah rokhawlhna a awm avangin sem theih hun a tlai ta deuh a, mipui hriatthiamna kan ngen a ni," an ti.

A ruala thla thum quota sem chu la tih ngai loh a nih avangin FCSCA department leh National Informatics Centre (NIC) ten AePDS Software (ration semna software) her danglam tumin hma an lak thu leh, an siamrem mai theih loh avangin hun eng emaw chen ration sem a khaihlak phah thu an tarlang.

FCSCA chuan, June 23, 2025 aṭangin ePoS machine hman theih a ni tawh tih sawiin, "Ration la turte'n vawi thum kut nem zel tur a ni. Thla thum ration NFSA quota hi dan pangngai angin a thlawn veka khul tur a ni a, mipuite chu harsatna awm loa an quota la vek tur leh retailer-te pawn an mawhphurhna ṭha taka hlen ṭheuh turin duhsakna kan hlan a ni," an ti.

Supply department chuan, ration card pawl quota-a a man nei chin kg 3 (kg 1 Rs 15 man), card var leh card sen te chu a pangngaiin, thla khat quota tê têa lak tur a nih thu an tarlang bawk.