H/S zirtirtute tan career guidance district tinah buatsaih mek a ni

Samagra Shiksha leh Institute of Advanced Studies in Education (IASE) chuan tunlai hian district khawpui hrang hrangah high school zirtirtute tan 'Sensitisation Training on Career Guidance' an buatsaih a; district pakuaah buatsaih tawhin, Aizawl leh Lunglei an la hmabak.

Sensitisation training hi June 9, 2025 khan Saitualah ṭan niin, nimin khan Hnahthialah buatsaih a ni a; Khawzawl, Champhai, Mamit, Kolasib, Serchhip, Lawngtlai leh Siahaahte buatsaih a ni tawh. June 27-ah Lungleiah an buatsaih leh ang a, chumi hnua Aizawlah buatsaih leh hnuah zawh a ni ang.

Training neihpui tur hian IASE thawk zirtirtu mi 15 ruat an ni a, anni hian insem darhin, khawpui hrang hrangah training an neihpui a ni. Nimin khan Hnahthial College-ah Hnahthial district-a high school zirtirtute tan buatsaih a ni a; IASE assistant professor pali - Dr Lalmawipuii Chawngthu, Dr D Sangzuala, Dr J Lalsangzuala leh Liantluangpuii Sailo ten thil pawimawhte an hrilhfiah.

Mizoram Samagra Shiksha leh IASE ten vocational interest study tia zirchianna an neihnaah high school zirlai zingah mahni tui zawng hre chiang lo leh nih tum nei lem lo tam tak an awm a, career awareness an mamawh hle tih hmuh chhuah a ni.

Hei vang hian H/S zirlaite chu an zirtirtute'n career awareness an neihpui theih nan Samagra Shiksha leh IASE chuan H/S zirtirtute pualin Career Guidance Sensitisation Training an buatsaih a; zirtirtute'n a remchan angin an zirlaite chu career awareness an neihpui ve leh ang.