District 3-ah media workshop buatsaih

Directorate of Information & Public Relations leh Mizoram Journalist Association (MJA) Gen.Hqrs bultumin nimin khan Lunglei, Mamit leh Hnathialah te MJA member-te pualin media workshop buatsaih a ni.

Media workshop hi MJA General Conference 2025-in a rel anga buatsaih a ni a; Lengzem editor Vanneihtluanga paper 'Traditional media and new media' tih leh, Dr H Laldinmawia, Pachhunga University paper 'Mizo ṭawng ziah dan dik' tih thupuite zirho niin, huam zau taka sawiho nghal a ni.

Lungleiah chuan zirhona hi Lunglei Press Club-ah buatsaih niin, MJA, Lunglei District president H Lalthansanga'n a kaihruai a; Lunglei IPRO C Lalhruaitluanga kaihhruaiin 'Traditional media and new media' tih zirho niin, MJA treasurer K Lalrinpuia kaihhruaiin 'Mizo ṭawng ziah dan dik' tih zirho a ni.

Zirhonaah hian Lungleia IPR department-a thawk te, MJA member te, Akashvani Lungleia Aaj Subah thuthar puangtu te, Zonet JB-a chanchin thar puangtute leh thuthar la khawmtu dangte an tel.

Mamitah chuan Information & Public Relations hmunah Mamit district-a print media leh digital media-te tan media workshop buatsaih a ni. Chawhmaah IPRO Biaknungi kaihruaiin hun hman a ni a, resource person-te paper buatsaih zirho a ni.

Hnahthialah pawh IPRO pisaah zirhona buatsaih a ni a, Hnahthial DIPRO pisa-ah neih a ni a. MJA, Hnahthial District president F Zosangliana'n inkhawm a kaihruai a, IPRO F Lalrinfela kaihruaiin paper buatsaihte zirho a ni.