Sialhawkin nikum aiin kuminah lakhuihthei thar tam an inbeisei

Sialhawk khua chuan nikum 2024 aiin kumin 2025-ah lakhuihthei thar tam zawk an inbeisei. Nikum khan quintal 9,000 vel an thar a, kuminah quintal 12,000 vel thar chhuah theih an inring.

Sialhawk Lakhuihthei Society hruaitute hnen aṭanga thu dawn danin, Sialhawk khuaah hian chhungkaw 250 velin lakhuihthei an ching mek a; kuminah quintal 200 vel an seng tawh a, July thla tawp lam aṭangin August thla laihawl vel thleng seng rûnpui an nei ṭhin.

Lakhuihthei hralh chungchangah hian kum tin harsatna nei thin mah se, kuminah chuan Clover Organic Company leh Tuichangral FPC hmalaknain Aromatic Company, Guwahati nen an indawr a, Aromatic Company hian an lakhuihthei thar chhuahte an leisak dawn avangin harsatna an tawh loh an beisei. Kumina an thar chhuah angte pawh Aromatic Company-in an laksak zel tawh a ni.

Sialhawk khaw mipuiin kum 2015 vel aṭangin lakhuihthei an chíng ṭan a, tuna lakhuihthei ching chhungkaw 250 zinga chhungkaw 100 chuangin lakhuihthei chin chu eizawnna ber atan an hmang a ni.