YMA hmalakna zarah gas-in Ziaawm lam a pan - CM Hawla

Chief minister Lal Thanhawla chuan, YMA hmalakna zarah eirawngbawlna gas-in ziaawm lam a pan mek niin a sawi a, "Gas thlen ṭhat leh ṭhat lohah sorkar ang chuan hmalak a harsa," a ti.

Nimina Congress Bhavan-a inkhawmah thu sawiin, Chief Minister chuan, eirawng-bawlna gas chungchanga YMA hmalakna a fak a, "YMA hmalakna zarah eirawngbawlna gas-in ziaawm lam a pan mek a, an hmalaknaah hian sorkar chuan YMA hnenah lawmthu sawi a ba nasa hle," a ti a; eirawngbawlna gas-ah Mizoramin tun dinhmun thlen theih chhan chu YMA vang a nih thu a sawi.

Lal Thanhawla chuan, gas thlen ṭhat leh ṭhat loh chu company leh agent-te inkarah a nih thu sawiin, "Sorkar anga hmalak a harsa. Hetih rual hian, gas harsatna chu mipui tam tak nghawng a nih miau avangin sorkar chu mipui tana ding tur a nih angin theihtawp chhuaha hmalak a ni," a ti.

YMA-in Mualkhang leh a chhehvelah gas khawih chingpen ṭhinte nasa takin an vâi tih sawiin CM Hawla chuan, "YMA-te hi department pawhin thlawpin, mi eng emaw zat man an ni tawh a, pawi khawihtute hrem chu Court lam thuneihna a nih tawh," a ti a; gas khawih chingpente hrem leh hrem loah sorkarin tih theih a neih loh thu a sawi.

Chief Minister sawi danin, gas phur tur hian licence chi hrang hrang neih a ngaih avangin a duh duh tan phurh mai theih a ni lo a, sorkar pawhin a phurh ve theihna atan hmalak mek a ni.

Mizo ṭhalaite'n an thawh theih reng an thawh duh loh leh peih loh vangin hna thawk tur hnam dang mikhual nuai hnih velin Mizoram an chên chilh mek tih sawiin CM Hawla chuan, "Hemi titawp tur hian sorkar chuan theihtawp a chhuah mek a. Tunah hian skill development lamah ṭan lak a ni," a ti a; mistiri training pawh buatsaih mek a nih thu a sawi.

Lal Thanhawla chuan, Mizoram páwna cheng Zo hnahthlak hnam péng hrang hrangin Mizoram chu an thlahlel hle tih sawiin, "An Jerusalem ang hiala an ngaih avangin a chhunga chengte hian rilru zau tak kan put a, an innghahna tlak ni thei tura kuah khawm thiam a ṭul," a ti.