KHAWTHLIR
Hâlpuah khap
Aizawl District Magistrate chuan Cr.PC Section 144 tlawhchhanin hâlpuah leh hâlmawi lak luh, zawrh leh hman a khap. Silai lem, a mu kâp chhuak thei chi lak luh, zawrh leh hman a khap bawk. Thupek hi Krismas leh kum thar boruak muanawm leh thianghlim tak hnuaia hman a nih theih nana chhuah a ni a; nimin aṭanga thla hnih chhung a huam ang.
MZU symposium
Sahitya Akademi leh Mizoram University-a Department of English-te chuan nimin khan MZU guest house conference hall-ah 'Child lore and identity' tih thupui hmangin national symposium an buatsaih.
Pathianniah hawng dawn
K Lalnghakliana Filling Station, Ngaizel chu mipuite mamawhna avangin Pathianniah hawn a ni tawh dawn a, chhun dar 12 aṭanga tlai dar 4 thleng dawr theih an ni ang.
Inkhawmpui tan
Seventhday Adventist huaia Zoram Danial Pawl Chhantu inkhawmpui vawi 45-na chu Ningani zan khan New Champhai khelmualah ṭan a ni. Inkhawmpuiah hian thupui chu 'Amen, lo kal ta che Lalpa Isu' tih a ni a, mi hrang hrangin an sawi ang.
Ruah a sur nasa dawn
GAD chuan thuchhuah siamin, vawiin leh naktuk hian Manipur, Mizoram leh Tripura-ah ruah nasa taka a sûr tur thu Ministry of Home Affairs, Control Room
aṭangin an dawng tih a tarlang a; mi tinte fimkhur a, chhiatna thleng thei laka inveng lâwk turin an chah.
Court tur en
Lawngtlai College Venga district court hmun tura ruahman chu nimin khan Gauhati High Court judge Michael Zothankhuma'n a tlawh a, hmalak zui dan tur a enfiah. District Court hmun atan hian tuna hmun neih lai hian a zawh tawh loh avangin hmun ṭha leh rem zawk zawn a ni a, district council-ah ram ruak a awm loh avangin mimal ram en a ni.