Kawlphetha man pek lâwk dan tur sawiho

Joint Electricity Regulatory Commission (JERC) for Manipur & Mizoram chuan nimin khan IPR conference hall-ah kawlphetha man pek lawk theihna tura duan, Pre-Payment Metering System chungchang zir chianna an buatsaih a; chief secretary Lalmalsawma'n a hmanpui.

Chief Secretary chuan, Pre-Payment Metering System chu kalpui theih a nih chuan bill pek tlai leh khawn chhung rei lutuk vanga sorkar sum báwma lut tur lut tlai lutuk ṭhinte pumpelh theih a nih tur thu a sawi a, "Kawlpetha sem zâi kawngah pawh nasa taka hmasawnna a thlen ka beisei," a ti.

Kawlphetha man pek lâwk a nih chuan mipuiin an hman zat chiah chiah an chawi dawn avangin bill siam sual vanga buaipui zui ngai awm tawh lo tura a ngaih thu sawiin Lalmalsawma chuan, "Chhungkaw tinte'n an kawlphetha mamawh an hriat chian phah ang a, a lo thlawna kawlphetha hmang an tlem phah dawn a ni," a ti a; kawlphetha chu ram pum ang pawhin a insem zai ṭhat phah tur thu a sawi.

JERC chairperson RK Kishore pawhin thu a sawi a; Pre-Payment Metering System atana JERC-in a thawhpui company, Secure Meters Ltd. aiawhte'n he kalphung thar an sawifiah.

Sorkar thuchhuah tarlan danin, Pre-Payment Metering System hi mobile phone-a pre-paid system ang hi a ni a, thla tawpa bill pek ngai kher loin, pre-paid meter-a ‘top-up’ thun zat milin electric hman tur a ni. Top-up pawisa a zawh chuan electric hman theih a ni dawn lo a, chuvang chuan sum neihin a tlin daih tâwk chiah kawlphetha hman theih a ni ang.

Contract load aia sang current a hman theih dawn lo a, meter reading la tur emaw, bill pe lote current tihtawp sak emaw tihnunsak leh turin P&E department mi leh sa intirh kher a ngai dawn lo a, department sum hloh leh hman a tlem phah hle beisei a ni.