Kaskau-a Bru enfiah hna a hunah zo thei lo

Tripura Bru relief camp-a awm Mizoram Bru-te November thla tàwp lama hruai kirna tura Bru enfiah hna chu nimin khan Kaskau camp-ah chhunzawma ni. Nimin kha Kaskau camp bikah enfiah tawp ní ni mah se, enfiah tur eng emaw zat an la awm avangin Kaskau-ah hian vawiinah chhunzawm leh a ni ang.

Kaskau camp-ah hian No-vember 2-ah enfiah hna ṭan a ni a, nimin bikah chhungkaw 210-a mite enfiah an ni. November 2-ah chhungkaw 83 enfiah an ni tawh a, November 3-ah chhungkaw 272 enfiah an ni tawh bawk. Ni thum chhungin chhungkaw 482 aṭangin mi 2,669 enfiah an ni a, an zinga mi 115 chu Kolasib district-a dah turte niin, a bak zawng chu Mamit district-a dah tur an ni.

Ruahman ang chuan Kaskau camp-a mite hi nimina enfiah zawh tura ngaih a nih laiin, niminah an enfiah zo hman lo a, vawiinah enfiah chhunzawm a ni ang. Kolasib district mite bik chu nimin khan an enfiah zo a, Mamit district-a mite enfiah zawh a la ni lo a, vawiinah an zo hman tawh tura beisei a ni.

Thu dawn danin, Bru chung-changah hian Tripura sorkar a fimkhur hle a, Mizoram aṭanga tripura-a an luh tirha ration card an pek chhuah bak chu tu leh fate an neih belh pawhin an update duh lo. Chuvang chuan, endiknaah pawh fimkhur a ngai leh zual a, endik hna a muan phah a ni.

November 7-ah Khak-changpara-a mite endik an ni ang a; November 9-10 ah Hamsapara-a mi te, November 11-14 ah Asapara camp-a mi te, November 15-18 inkarah Naisingpara camp-a mite leh November 21-ah Hazachera camp-a mite enfiah an ni ang.