MIZOFED-in buhfai supply dan sawifiah

MIZOFED managing director Lalfakzuali chuan Mizoram sorkara buhfai supply dan sawifiahna a tichhuak a; MIZOFED-in sorkara buhfai a pek tawh zat a tarlan belhkhawm chu quintal 1,13,000 a ni.

MIZOFED sawifiahna chuan, buhfai chu August 2016-ah an supply ṭan tih tarlangin, "Mipui ei tur a nih angin 'A' grade rice chauh supply a ni. Buhfai trip lo thlengte lo endik turin kudamah eng lai pawha duty dahin, buhfai ṭhat leh ṭhat loh endik zel a ni a, 'A' grade ni lo, mipui ei atana iaiawm chin chu hnâwl zel a ni," a ti a; August leh September thlaa an supply zingah pawh truck trip 10 chuang hnawl a nih thu leh, chu'ngte an tihral dan an hriatpui loh thu a tarlang.

MIZOFED chuan, buhfai chu hmun hrang hrang, mi hrang hrang aṭangin an lei khawm a, Guwahati leh a aia hlaa mite pawh an lei tih an sawi a, "MIZOFED hian sorkar duh ang 'A' grade hmuh theihna hmun apiang aṭangin a lei mai a, heng kan buhfai chungchangah hian mimal, pawl, SUpply Minister leh a department-te an inrawlh lo," a ti.

MIZOFED tarlan danin, June 5, 2016-ah Supply department
aṭangin supply order hmasa ber hmuin, qtl. 30,000 supply tura tih an ni a; August 20, 2016 ral hmaa supply tura tih an nih angin an pe. August 22-ah allotment vawi hnihna an hmu a, September 9-a zo hman tura tih an nih angin qtl. 40,000 an pe a ni.

September 15-ah allotment pathumna hmuin, qtl. 33,300 supply tura tih an ni a, hun tiam chhungin an pe thei. Allotment vawi lina chu September 23-ah an hmu angin, hun tiam chhungin qtl. 9,70 an supply leh bawk.

MIZOFED chuan, allotment an hmuh vawi lina, September 23 hnuah allotment dang an la hmu leh lo niin an tarlang a, "Supply kan zawhfel pawh September 28, 2016 daih kha a ni tawh a, a bill pawh allotment wise-in sorkarah thehluh vek tawh a ni," an ti.