Tuichangral zirlaiin khawmpui an hmang

Tuichangral Zirlai Pawl (TZP)-in Nilaini aṭanga Saihnuna Hall, Leng khuaa inkhawmpui an hman ṭan chu nimin khan minister C Ngunlianchunga leh bialtu MLA Vanlalawmpuii Chawngthu ten an hmanpui.

C Ngunlianchunga chuan, Hrangturzo bial chhungah zirnaa hlawhtling leh entawn tlak tam tak an chhuak tawh tih sawiin, "An hnung zui tur ṭhalai lehkha thiam leh mi puitling tam tak an la rawn chhuah zel ka beisei. Zirlai chuan lehkha a zir lai aṭangin a kawng tur, a tui zawng, eng hna hi nge a dam chhungin thawk se atan ṭha ang tih a zawn thiam a ngai," a ti.

Pathianin mi tinte tuina leh theihna kawng inang lo tak tak a pek avangin mahni kawng tur hriat chian a ṭul tih sawiin, Minister chuan, a ṭul apiang thawk bawrh bawrh zel turin zirlaite a chah.

Vanlalawmpui Chawng-thu pawhin thu sawiin, "Zirlai pawlte'n intihchak tawn nan inkhawmpui leh programme hrang hrang an buatsaih ṭhin hi a lawmawm. Chutih laiin, kan phâk tâwk leh tlin tawk hre reng chunga buatsaih nachang kan hriat a ṭul. Zirlai kan nih ang takin kan rilruah kan zirna lian ber zel se ka duh," a ti.

TZP inkhawmpui hi kum tin Aizawl leh Tui-changral huam chhungah a inchhâwka neih ṭhin a ni a, kumin hian khaw 13 aṭangin zirlai 300 chuang an tel a ni.