Mizoramah eco tourism hmangin Sorkarin khualzin hîp luh a tum

Environment, Forest & Climate Change (EFCC) minister Lalrinmawia Ralte chuan, eco tourism hmangin Mizoramah khualzin hìp luh tum a nih thu leh Mizoram Eco Tourism Policy duan zawh a nih tawh thu a sawi.

Lalrinmawia Ralte hian nimin khan Congress Bhavan-ah thu sawiin, "Mizoram hi eco tourism atan ṭha an ti ṭhin. State dangah chuan ramngaw awm mah se, nungcha thâwm hriat tur a awm lo. Mizoramah chuan sava chi hrang hrang hrâm thâwm hriat tur a tam hle. State dang chuan dil lian tak tak nei mah se, sangha hmuh tur a awm ve mang lo. Khualzin hîp luhna tham ramngaw kan nei a ni," a ti.

Mizoram Eco Tourism Policy duan zawh tawh a nih thu sawiin EFCC Minister chuan, "Kan policy duan hi Chief Minister pawhin a pawm tawh," a ti a; ramngaw leh nungcha behchhana khualzin hîp luh tum a nih thu a sawi.

Lalrinmawia Ralte sawi danin, Supreme Court-in Writ Petition 1995 thu kal zela aṭanga order a chhuah angin, Wood Based Industries (Establishment & Regulation) Guidelines, 2016 chu September 22, 2016-ah a tichhuak a; chumi ang chuan tun hma lama thing hring kih phal loh vanga thing hmanga eizawngte'n harsatna an tawh ṭhin chung-chang leh ram-
ngaw chungchang Central thuneihna ni ṭhin chu state thuneihna pumhlûm a ni tawh dawn a ni.