PHE officer kaisangte lawmna hun hmang

Association of PHE Officers chuan nimin khan officer pangate kaisan lawmna hun, Water Treatment Plant Site, Dihmunzawlah an hmang a; PHE minister Zodintluanga'n hmanpuiin, officer-te fuihna thu a sawi.

Zodintluanga chuan, "Congress sorkarah vision ṭha leader CM Lal Thanhawla kan neih avangin hmasawnna tam tak nei zingah PHE kan tel hi a lawmawm em em a ni," a ti a; kum hnih leh a chanve chuang hret PHE a enkawl chhungin assistant engineer thar 11 an la thei chu lawmawm a tih thu a sawi.

PHE engineer kaisangte hi - Lalmuanzova (chief engineer aṭangin engineer-in-chief-ah), C Lallunghnema (SE aṭangin CE-ah), Zodinthari (EE aṭangin SE-ah), Lalzuimawii (SDO aṭangin EE-ah) leh, C Zothantluanga (SDO aṭangin EE-ah)-te an ni.