NEDP hnuaiah Horticulture-ah nuai 200 dah Purûn sen chîn nan Agri-ah nuai 160 dah

Lunglei district-a oil palm chíngtute chuan nimin khan Lunglei Convention Centre-ah infuih tharna hun an hmang. Khuallian, Horticulture minister PC Lalthanliana chuan, New Economic Development Programme (NEDP) hnuaiah Horticulture-ah cheng nuai 200 dah a nih thu leh purûn sen chin nan Agriculture department-ah cheng nuai 160 dah a nih tawh thu a sawi.

Horticulture Minister chuan, NEDP hnuaiah purûn sen chìn nan Agriculture department-ah cheng nuai 160 dah a ni tawha sawiin, "Kan ramah purûn sen a ṭha duh em em a, mahse, kan intodelh thei si lo. Mizoram aṭanga kan thar chhuah ngei a to zawk tlatte hi a mak a; Silchar aṭanga purûn sen lak luh chu zawi zawia tihtlem tum... Lo neitute thlai chìnna kawngte chu motor luh theih tura laih nan NEDP-ah pawisa dah vek a ni," a ti.

PC Lalthanliana chuan, oil palm chingtute tan sorkarin nasa taka sum a sên tawh laia thar chhuah a la tlem chu ṭha lo a tih thu sawiin, "Mizoramah lemchang nun a tam ta lutuk a ni. Kut hnathawk kan ni emaw, politics kan khelhnaah emaw, zirna lamah pawh lemchang kan tam ta lutuk hi bànsan a hun tawh a, ham-
ṭhatna duh vanga politics-a lut ta maite pawh a awm theih," a ti a; kut hnathawktute'n tum nei râna an thawh a ngaih thu leh, thlai chìn tur thlak fo a hun tawh loh thu a sawi.

NLUP-ah mumal takin trade hrang hrangah sorkarin hma a la tih sawiin, Minister chuan, "Heng ṭanpuinate hi sum a ken tel ringawt thlahlel kan ni ang tih a hlauhawm a, thawhrimna tel loa hlawhtlin chu beidawnna a ni. Officer corrupt aiin beneficiary corrupt vanga kut hnathawktu hlawhchham hi kan tam em em a, sorkarin ṭanpuina a pekah hian kan inen lêt a hun tawh a, ti tak tak peih tan sorkar hi a tlanchhe dawn lo," a ti.

Lalthanliana chuan, kut hnathawktute chu Mizoram intodelh theihna tura thawk tak tak turin a sáwm a, “Tih tak takna a awm chuan a tawpah hlawhtlinna a awm ṭhin," a ti. Mizorama kawngpui ṭha lote chu fûr ruahtui tlak tam leh tlak rei vang a nih thu sawiin, a ṭhat theih nan hna thawh mek a nih thu a sawi bawk.

Lunglei DAO J Rothanga sawi danin, Lunglei district-ah oil palm ṭiak 8,75,169 sem tawh a ni a, ṭiak khat Rs. 85 man niin, cheng nuai 740.5 chuang sen a ni tawh. Lunglei district-ah hian kum 16 chhung oil palm chîn a ni tawh a, a thu aṭang chuan ram hectare 6,010-a zauah chin a nih laiin, a takah chuan hectare 2,600-a zauah chin a ni.