Sorkarin gas a phur ṭan ta

Mizoram sorkara Food, Civil Supplies & Consumer Affairs (FCSCA) department ruahman angin, Mizo-rama eirawngbawlna gas harsatna zualpui phuhrûkna turin November 5, Inrinni aṭang khan gas an phur ṭan ta.

FCSCA secretary Dr Franklin Laltinkhuma hnen aṭanga thu dawn danin, gas phurhna tura FCSCA department-in truck a ruahman hmangin Mualkhang Gas Bottling Plant aṭangin gas an phur chhuak ṭan a, gas agency hrang hrangah an dah.

Sorkarin ruahman anga gas phurtu lirtheiah hian hmanhmawh-thlak bik a nih thu leh tikhawmuang lo tura hriattirna lehkha tàr a ni.

Dr Franklin Laltinkhuma chuan, gas phur tur hian IOC-in Supply department chu truck 20 hman phalsak mah se, tunah chuan document/criteria an duh uluk avangin truck pasarih chiah tan work order an issue rih tih a sawi a, "Kan buaipui mek zel a, truck 20 chu kan tlantir theih thuai kan beisei," a ti.

FCSCA Secretary chuan, gas harsatna a ziaawm chho zel niin a sawi a; November 5-ah pawh khan Mualkhang aṭangin truck 11 leh Borkhola (Silchar) aṭangin truck 12-in gas an phur chhuak a, Mualkhang Bottling Plant-a dah tur bullet truck pali Silchar aṭangin an rawn chhuak tih a sawi bawk.

Dr Franklin Laltinkhuma chuan, tuna gas bûrte chu tihchingpen a ni tawh lo tih sawiin, "Bûk tling lo bûr 1,20,000 kha kan kham tâwk ṭhin a, Inrinnia gas kan phurh ṭan aṭanga tun anga gas bur leh bullet truck a lo thlen chuan thla khatah bûr 1,50,000 aia tam kan dawng tawh ang," a ti.

Thil a kal tluan chuan, gas bûr pakhatin hun rei zawk a daih tawh ang a, internet hmangin a duh tan gas a order theih tih a sawi a ni.