KHAWTHLIR

Thisen pe

November 5, 2016 khan Salvation Army Youth, Central South Division chuan Saitual-ah Aizawl Civil Hospital tan thisen unit 59 an pe a, a petute mipa 49 leh hmeichhia 10 an ni. Chawnpui Vengthlang Branch KṬP-in Synod Hospital tan unit 29 an pe a, a petute mipa 17 leh hmeichhia pahnih an ni a; Zotlang ṬKP-in an din champha pualin Aizawl Civil Hopital-ah unit 17 an pe a, a petute mipa 15 leh hmeichhia pahnih an ni.

Financial campaign

Mizoram Rural Bank (MRB) leh YLA sub-headquarter, Sangau-te chuan October 31 aṭanga November 5 thleng khan Sangau leh Cheural khuaah Financial Literacy Awareness Campaign an buatsaih. Bank kalphung leh a kaihhnawih thil chi hrang hrang mipui an zirtir a; Cheural khuaa ṭanpui ngai thlan chhuah mi pahnih hnenah Rs. 2,000 ve ve hlan a ni bawk.

Volleyball court

Kolasib College Venga volleyball court thar chu Inrinni khan bialtu MLA PC Zoram Sangliana'n a hawng. He court hi Rajya Sabha MP fund cheng nuai khat leh department aṭanga sum hmuh hmanga siam a ni.

PUC-in A+ hmu

Pachhunga University College chu National Assessment & Accreditation Council (NAAC) peer team-in an enfiah hnuah, Grade A+ an pe. PUC hi total mark 4 aṭangin 3.51 an pe a, chu chu Grade A+ niin, college ṭha tehnaa a sang ber dawttu a ni. NAAC second cycle-ah hian India ram puma college 170 endik a ni a, chu'ng zingah chuan PUC leh College of Defence Management, Hyderabad chiahin A+ an hmu a ni.

Library kum 25-na

Bethlehem Vengthlang YMA chuan November 4, 2016 zan khan an branch YMA Library silver jubillee an lawm a, bialtu MLA R Vanlalvena'n a hmanpui. Bethlehem Vengthlang Branch YMA Library-ah hian lehkhabu 9,666 a awm mek a ni.

LIKBK khawmpui

Lairam Isua Krista Baptist Kohhran (LIKBK) Assembly hnuaia inkhawmpui lian ber, Regional Church Council (RCC) Inkhawmpui vawi hnihna chu November 3-6, 2016 chhung khan a rualin Regional Church Council pangaah neih a ni. Nimin khan kumina upa exam-a tlingte nemngheh an ni.

Inhnial fiamna

Lawngtlai District Swachh Bharat Mission (Gramin) chuan November 4, 2016 zan khan Lawngtlaia LADC Hall-ah 'Faina kawng zawh tur hian kan rilru kan inpeih tâwk' tih thupui hmangin inhnial fiamna (debate) a buatsaih a; Lawngtlai DRDA project director H Dolianbuaia'n a hmanpui. Debate-ah hian Francis C Lalrohluzuala, Don Bosco School chu Best Debator-ah thlan a ni.

Missionary tirh kum 50-na lawm

Mara ram aṭanga hmun danga missionary tirh chhuah kum 50-na, golden jubilee chu November 4, 2016 zan aṭangin Evangelical Church of Maraland Siaha Vengpui Kohhranah lawm a ni a, nizan khan a ṭiak. ECM hian 1966-ah Burma rama Khumi hnam zingah Pathian thu hril turin missionary A Khosa a tîr chhuak a ni.