College-te'n infrastructure tha an neih nan Sorkarin theihtawp a chhuah - CM Hawla

Chief minister Lal Thanhawla chuan November 4, 2016 tlai khan T Romana College building thar, Republic Veng-thlanga sak tur lungphùm a phúm. Chief Minister chuan, college-te'n infrastructure ṭha an neih theih nan sorkarin theihtawp a chhuah mek thu sawiin, "Theih ang angin sum dap mek a ni," a ti.

CM Lal Thanhawla chuan, "Sorkarin college-te'n infrastructure ṭha an neih a ngai pawimawh a, hemi atan hian RUSA hi
ṭangkai leh ṭha zawka hman tum a ni," a ti a; agency hrang hrang aṭangin a thei ang angin sum dap mek a nih thu a sawi.

Aizawla college tam zawkin hmunhma ṭha an neih loh thu sawiin, CM Hawla chuan, "Hmunhma ṭha an neih theih nan sorkarin ngaihtuahna séngin an tan hmun rem a dap zel. Mimal ṭhenkhatte'n zirna-in leh sorkar ramte dik lo takin khawngaih-thlak khawpin an nékchêp a, J Thankima College tana sorkarin Brigade rama hmun a pek pawh mimal ṭhenkhatin harsatna an siam mek a ni," a ti.

Lal Thanhawla chuan, sor-kar-in zirna zîktluak leh ṭha quality education-te a phâk tâwk angin a ngaituah tih sawiin, Lal Thanhawla chuan, "Zirna tihhmasawnna atan Education Reforms Commission a din a, mahse, duh anga sum hman tur sorkarin a neih loh avangin a rawtnate hi tihhlawhtlin a harsa a, chuti chung chuan kan phak tâwk leh kan theih ang angin tumna nen an rawtnate tihhlawhtlin kan tum a ni," a ti a; zirna lama hmasawnna turin theihtawp sorkarina chhuah zel thu a sawi.

Inkhawmah hian Home minister R Lalzirliana leh Higher & Technical Education minister R Romawia te pawhin thu an sawi.

T Romana College campus thar dinna atan hian sorkarin Republic Vengthlang Middle School hmun bigha 4.7 vela zau chu tun hnai khan a pe a, hmun tharah hian nakkum aṭangin college session ṭan tum a ni.

RUSA aṭanga sum hmuh hmangin college building, a dung ft. 59.5 leh a vâng ft. 41.4-a zau sak tum a ni a; chhawng lia sak tum niin, a bul ṭan nan chhawng hnih sak phawt tum a ni.