MLA-in JNV tur sak mek a enfiah

MAMCO chairman Dr Ngurdingliana, MLA chuan tun hnai khan Mamita Jawahar Navodaya Vidyalaya (JNV) building sak mek a tlawh a, chak zawka hna thawk turin contractor-te a hrilh.

Dr Ngurdingliana chuan, JNV atana luah mek chu a hmun a chêp avangin naupang harsatna hria a, hna chak zawka thawk tura contractor-te chahin, November 10, 2016 ral hma ngeia hna an chhunzawm theih dawn leh dawn loh amah hriattir turin a hrilh a, "Harsatna hrang hrang vanga hna in chhunzawm thei dawn lo a nih chuan department-in an chhunzawm mai a ngai dawn a ni," a ti.

MAMCO Chairman chuan, JNV administrative block, academic block, hostel leh kitchen-te chu February 2017 ral hmaa zo hman tura hmalak a nih thu leh, kum 2016-17 academic session aṭang chuan an hmunhma hi luah hman tum a nih thu a sawi.

Contractor-te chuan, administrative approval an hmuh hnu kum khatah drawing an hmuh chauh vang te, sikul hmun petu, ram neitute'n lungawi lohna an neih vang te, running bill a hun taka an hmuh loh vangte leh tun dinhmunah kawng chhiat vanga bungraw phurhnaah harsatna an tawh avangtein hna an thawk chak thei lo niin MLA an hrilh.