Tlabung mite'n Lungleiah gas an la

Lunglei-Tlabung kawng, NH-302 ah eirawngbawlna gas phur truck-te an tlân duh rih loh avangin Tlabung leh a chhehvel khaw hrang hranga mipuite'n gas an ngei tawh. Tlabunga dah tur gas phur truck-te'n Tlabung kawng an zawh duh loh avangin Lungleiah gas an dah a, Tlabung thlenpui loin an lêt leh ṭhin nia thu dawn a ni.

Tlabung Post editor Vanlalhriatpuia hnen aṭanga thu dawn danin, tun hnaiah Mualkhang Bottling Plant aṭangin truck pahnihin Tlabunga sem tur gas an phur chhuak a, October 22-ah búr 306 leh October thla tàwpah búr 270 phurh chhuah a ni.

Gas phurtute chuan kawng chhia chhuanlamin Tlabungah an phur thleng duh lo a; Tlabung tana gas distributor Zomawi Gas Agency chuan gas chu Lungleiah an sem a, Tlabunga chhungkaw eng emaw zat chuan Lungleiah kal chilhin gas an la a, gas bûr pakhatah a man bakah Rs. 900-1,000 an seng niin an sawi.

Thu dawnna chuan, Lunglei leh Tlabung kawngpui chu duhthusamin la ṭha lo mah se, lirthei lian an kal thei tawh a, Tlabunga dawrkaite bungrua tur pawh lirthei liante'n an phur reng niin a sawi.

Hetih lai hian, Mizo Students' Union (MSU) headquarters, Tlabung chuan thuchhuah siamin, Lunglei-Tlabung kawng chhiat vangin Tlabung leh a chhehvel khaw hrang hrang mite'n hun rei tak harsatna an tawk tawh tih an tarlang a; an harsatna tawhte chu a sutkian dan kawng zawnsak turin thuneitute an phût nawn.

Tlabung MSU chuan, PWD hotute'n November chawlhkar hmasa bera kawng chhe zual hnawh zo tur anga October 22, 2016-a press mite hmaa an sawi laiin, tun thlenga an hna thawh erawh mipuiin an duhkhawp lo hle tih an sawi a, "Kawng khuar lai ṭhenkhat hnawhna atana lung hnip tak tak hman a nite hi a pawi a, lung sakhat dah tawp a ni ṭhin a, roadroller-a chîl mâm a nih loh avangin rei tak a daih dawn lo a ni," an ti. Kawng thawm ṭhat dan chu a hmuna en turin PWD hotute an ngen a ni.