Siaha-ah Fast Track Court hawng

Siaha-a Fast Track Court dah thar chu November 5, 2016 khan Gauhati High Court judge Michael Zothankhuma'n a hawng. Hawnna inkhawm hi Siaha Chief Judicial Magistrate Court Room-a neih a ni.

JusticeMichael Zothankhuma chuan, civil leh criminal thubuai lian, tun hmaa Lungleia ngaihtuah ngai ṭhin chu Siaha-ah Fast Track Court dah a nih tak avangin Lungleia kal ngai loin Siaha-ah ngaihtuah theih a ni dawn tawh tih a sawi a; pawi khawihtute chu dan anga hrem an nih theih nan thuhretu nih hreh lo turin mipuite a sáwm.

Siaha-a Fast Track Court hawnnaah hian MADC chief executive member RT Zachono pawhin thu sawiin, Judicial building leh quarters sak nan MADC-in ram a pek thu a sawi.

Hawnna inkhawm hi Lunglei District & Sessions judge R Thanga'n a kaihruai a; Gauhati High Court Aizawl Bench registrar TL Guite-in Siahaa Fast Track Court hawn a nih theihna tura inbuatsaih dan leh ruahman dante a sawi bawk.